अंबाजोगाईत प्रेम प्रकरणातून धारदार शस्त्राने वार करत तरुणाचा खून

अंबाजोगाई : अंबाजोगाई शहरात पोखरी रोडवर राजकुमार साहेबराव करडे या तरुणावर दोघा जणांनी कोयत्याने वार करून त्यास गंभीर जखमी केले होते. जखमी राजकुमारचा स्वाराती रुग्णालयात उपचार सुरु असताना मृत्यू झाला.या घटनेने शहरात खळबळ उडाली आहे. प्रेम प्रकरणातून खून झाल्याचा गुन्हा अंबाजोगाई शहर पोलीस ठाण्यात दाखल करण्यात आला आहे. अंबाजोगाई शहरातील राजकुमार करडे हा दोन वर्षापासून शॉर्ट फिल्म बनवत होता. चनई येथील एका युवतीशी त्याचे प्रेम संबंध होते. तो नेहमी सांगायचा माझ्या तिच्यावर प्रेम असून आम्ही दोघे लग्न करणार आहोत. परंतु, जात समजल्याने तिचे वडील लग्नाला विरोध करत होते. नेहमी मला माझ्या मुलीचा नाद सोड नाहीतर जिवे मारून टाकू अशा धमक्या देत असल्याचे राजकुमार करडे याने आईला सांगितले होते. वैजनाथ शिंदे, वेदांत शिंदे, या बाप लेकासह आदिनाथ भांडे, यांच्यावर गुन्हा दाखल करण्यात आला आहे. या हल्ल्यात राजकुमार गंभीर जखमी झाला होता. त्याच्यावर स्वाराती रुग्णालयात उपचार सुरू होते. मात्र, डॉक्टरांनी शर्थीचे प्रयत्न करूनही अतिरक्तस्त्रावामुळे राजकुमारचा उपचार सुरु असताना मृत्यू झाला. दरम्यान, या घटनेचा पुढील तपास अंबाजोगाई शहर पोलीस करत आहे.